അശ്രീകരം

ബക്കറ്റിൽ വീണു കിടന്ന തുമ്പിയെ 'അശ്രീകരം' എന്നു പിറുപിറുത്തു കൊണ്ട് അയാൾ ചുരുട്ടിയെടുത്തു പുറത്തേക്കെറിഞ്ഞു. അതുവരെ ബക്കറ്റ് വെള്ളത്തിലെ നിലയിലാക്കയത്തിൽ പ്രാണനുവേണ്ടി ചിറകിട്ടടിച്ചിരുന്ന തുമ്പി അതിശയത്തോടെ തിരിഞ്ഞു നോക്കി. തങ്ങളുടെ വർഗ്ഗത്തെ കൊണ്ട് കല്ലുകൾ എടുപ്പിക്കുന്ന മനുഷ്യ വർഗ്ഗത്തിന്റെ കഥകൾ മാത്രം കേട്ട് വളർന്ന തുമ്പി തന്നോട് ദയാവായ്പ് കാണിച്ച അയാളെ കൃതഞ്ജതയോടെ നോക്കി ചിറകടിച്ചുയർന്നു...